Dagbók Kristbjargar

2004-03-26T14:13:00.000Z

Barbára Sól er 3ja ára í dag, Elísabet og Gísli til hamingju með prinsessuna.

2004-03-26T14:10:00.000Z

Úff brjálað að gera í skólanum, kemst ekki yfir að lesa nema brot af því sem ég á að lesa, en eftir páska eru “bara” tvö verkefni eftir (þau eru að vísu bæði mjög stór).
Fór í morgun á leikskóla að fylgjast með samskiptum barna í leik. Við erum tvær að hjálpast að við þetta verkefni. Fylgdumst með fjórum strákum í tölvuleik og það var ótrúlegt hvað þeir voru klárir í samskiptum, vorum að vonast eftir slagsmálum eða einhverju krassandi til að hafa í verkefninu en þeir voru eins og englar, dem.

Velheppnuð leikhúsferð

2004-03-26T14:06:00.000Z

Fór á leikhús í gær með Helga og fullt af fólki úr vinnunni hans. Sáum “Þetta er allt að koma” eftir Hallgrím Helgason og það var mjög skemmtilegt. Ég var ánægð með þessa ferð sérstaklega vegna þess að Helgi skemmti sér vel. Það hljómar kannski frekar furðulega en hann hefur hingað til helst ekki viljað fara nema á söngleiki og þetta verður þá kannski til þess að það verði hægt að draga hann í leikhús í framtíðinni, Ekki það að ég vilji ekki fara á söngleiki, en ég væri til í að sjá miklu fleira.
Þetta var að vísu fremur löng sýning til að fara á ef maður er með barn á brjósti, en það er önnur saga.

Margrét Birna 3ja ára

2004-03-26T14:01:00.000Z

Margrét Birna átti 3 ára afmæli á miðvikudaginn (24 mars). Það var nú ekki mikil afmælisveisla þann daginn því við ætlum að hafa smá afmæliskaffi á morgun. Ég var með smá samviskubit yfir að gera ekkert fyrir hana en hún var samt ánægð með daginn held ég. Það var að sjálfsögðu gert eitthvað fyrir hana á leikskólanum, hún fékk kórónu, súkkulaðiköku og svo var að sjálfsögðu afmælissöngurinn sunginn fyrir hana. Það hittist líka svo vel á að það var verið að sýna leikritið um hana Búkollu í leikskólanum og Margrét Birna hefur sjálfsagt haldið að það væri allt henni til heiðurs á afmælisdaginn. Við sóttum hana öll þrjú á leikskólann og fórum og náðum í kökur með kaffinu og ís til að hafa í eftirmat um kvöldið (til að gera eitthvað fyrir hana). Hún var mjög spennt þegar hún kom heim því þar biðu hennar nokkrir pakkar, frá okkur og svo Elísi. Ásta Rut og Eva Rún komu líka í heimsókn og gáfu henni gjöf, hún var mjög ánægð með þetta allt saman.

Jón Ingi varð 4 mánaða í gær!

2004-03-18T12:07:00.000Z

Hádegistónleikar með Háskólakórnum

2004-03-18T12:03:00.000Z

Ég fór á tónleika í hádeginu í gær með Háskólakórnum. Ég bauð ömmu minni með en Ásta Rut systir mín er að syngja með kórnum. Tónleikarnir voru haldnir í Norræna húsinu og voru fremur þungir að mínu mati, en samt skemmtilegir. Ég fékk smá fiðring í magann því mig langar svo í kór. Ég er ákveðin að reyna að komast í Dómkórinn aftur í haust.

Ég geri allt of lítið af því að fara á hina ýmsu viðburði sem eru í boði hér og þar um borgina. Það er t.d. oft eitthvað í boði svona í hádeginu sem tekur ekki langan tíma og kostar ekki mikið. Þegar ég er orðin stór ætla ég að gera meira af því að sjá eitthvað af því sem er í boði eins og tónleika, leiksýningar, ljóðalestur, upplestur bóka, fyrirlestra og fl. Það er t.d. fyirlestur í kvöld á Grand Hótel sem ég væri alveg til í að sjá en þar er kona að fjalla um bókina sína sem um skyndilausnir á því hvernig við getum orðið hamingjusöm og jákvæð, ekki veitir af í nútíma samfélgagi.

Fæddur er lítill prins

2004-03-14T21:34:00.000Z

Við fengum skemmtilegt SMS í gær, Vignir og Þorbjörg eru búin að eignast son, 12,5 merkur og 51 cm. Hrafnkell Daði velkominn í heiminn, við hlökkum til að koma í heimsókn og sjá þig.

Íþróttaafrek Helga og Elísar

2004-03-14T21:24:00.000Z

Ég verð eiginlega að deila með ykkur smá sögu af þeim félögum Helga og Elísi. Ég var stödd úti í bæ og var á leiðinni heim þegar Helgi hringdi í mig og bað mig að koma við í apóteki og kaupa brjóstsviðatöflur af því að hann og Elís voru báðir að drepast úr brjóstsviða. Það er svo sem ekki merkilegt en ástæðan fyrir brjóstsviðanum er alveg lýsandi fyrir ótrúlegustu hugmyndum sem þeir fá stundum. Þeir voru að horfa á frjálsar íþróttir í sjónvarpinu og þar sem þeir hafa ekki mikinn áhuga á þeim reyndu þeir að búa til keppni úr því til að gera það áhugaverðara. Þeir fóru því að giska á hversu langt eða hátt stökkvararnir stukku eða hversu hratt hlaupararnir hlupu. Þetta dugði þó greinilega ekki til að gera frjálsar íþróttir spennandi. Þeir reyndu að rifja upp hvernig þeir stóðu sig í þessum íþróttum þegar þeir sjálfir kepptu í þessum íþróttum í skóla á sínum tíma. Í framhaldi af því fórum þeir að þræta um á hvaða tíma þeir myndu hlaupa 100 metrana í dag. Þar sem þeir voru ekki sammála, frekar en venjulega, þá þurfti að komast að því hvor hefði meira rétt fyrir sér (nauðsynlegt auðvitað). Þeir fóru því niður á laugardalsvöll (sem er að sjálfsögðu bannað) og tóku tímann á því hversu fljótir þeir væru að hlaupa. Þar sem þeir eru ekki í afbragðs formi og hafa lítið hreyft sig undanfarin ár, utan þess að röllta sér fram í eldhús eftir snarli yfir fótboltanum, þá voru þetta meiri átök en þeir þoldu. Þeir voru því að drepast úr bjóstsviða á eftir. Ég veit ekki af hverju þetta kom mér á óvart, ætti að vera orðin vön eftir öll þessi ár, en.........

Bollinn brotinn!!

2004-03-13T09:17:00.000Z

Jæja þar kom að því Liverpoolbollinn hans Helga hrökk í sundur enn einu sinni. Ég hef búist við þessu lengi, ekki að ég hafi beint verið að vona það, mér gat ekki verið meira sama. Málið er að bollinn heilagi brotnaði fyrir nokkrum árum og Helgi límdi bollann saman og notaði hann svo. Fyrst lak hann, en smá saman fylltust rifurnar af gömlu kaffi, bollasúpu og öðru góðgæti sem þar vildi tolla, þannig að bollinn þéttist og hætti að leka. Helgi var auðvitað hæstánægður með þetta og sagði að enginn steli honum svona útlítandi, það er að vísu alveg rétt hjá honum en ég man ekki eftir að það hafi verið sérstakt vandamál áður en hann brotnaði. Þarna hafa sem sagt safnast saman sýklar í nokkur ár og svo er Helgi að kenna Margréti Birnu um að hann hafi verið oftar veikur undanfarin ár, ég veit ekki betur en þetta hafi byrjað einmitt upp frá því er bollinn var límdur saman fyrst. Kannski verð ég að kaupa handa honum annan Liverpoolbolla, veit samt ekki hvort það dugar, hann er ótrúlega líkur pabba sínum, þeir skilja þetta sem eiga. Jæja en nú hélt bollinn færi í ruslið en nei, nú á að líma hann aftur saman og fylla upp í rifurnar á ný.

Brúðkaupssýning

2004-03-07T16:45:00.000Z

Fór á skemmtilega sýningu á föstudag og laugardag (sýningin er í dag líka en ég lét tvö skipti duga). Þetta var brúðkaupssýningin Já í Smáralind. Mér þykir alltaf gaman á svona sýningum en ég gaf mér nú ekki mikinn tíma til að skoða alla básana. Kom eiginlega á hlaupum í bæði skiptin til að sjá brúðarkjólasýningu á vegum Brúðakjólaleigu Katrínar. Á föstudeginum fór ég ein en en var búin að mæla mér mót við Rósu Íris, Katrínu, Ástu Rut og Evu Rún. Þetta var sölusýning og Hjördís var að sýna einn af kjólunum, mjög flottur og hún glæsileg. Ásta Rut, Eva Rún voru svo að sýna brúðarkjóla á laugardeginum og sunnudeginum og þær voru stórglæsilegar, rosa flottir kjólar allt saman. Við Hugrún Inga fórum og þurftum að halda aftur af tárunum (frekar viðkvæmar). Það var ekki síður skemmtilegt á eftir að sjá Guðrúnu Árnýu og Soffíu systur hennar syngja nokkur falleg og rómantísk lög, það er alltaf gaman að heyra Guðrúnu syngja hún hefur ótrúlega rödd finnst mér.

Afmælisbörn!

2004-03-07T16:40:00.000Z

Baldur Rafn til hamingju með 10 ára afmælið í gær, stórafmæli!!!!!!!!!

Helga Sif til hamingju með daginn í dag (32 ára, enn stærra afmæli, he, he, he ).

2004-03-04T09:53:00.000Z

Guðlaug til hamingju með afmælið

Sumt var betra í gamladaga

2004-03-04T09:52:00.000Z

Ég var að spjalla við vinkonu mína um daginn um hvað það var gaman í gamladaga þegar fólk kom í heimsókn yfir heila helgi. Það er eins og flestir séu hættir að gista hjá vinum og ættingjum, fara í heimsóknir einn dag eða kvöldstund og bruni svo heim til að sofa í sínu eigin rúmi. Eru þetta afleiðingar af þæginlegum amerískum rúmum þannig að fólk treystir sér ekki lengur til að sofa á dýnu eða gömlum svefnsófa?
Í sveitinni hjá mömmu var hér einu sinni algengt að svo margir voru í heimsókn að það var gist í hverju herbergi, jafnvel flatsæng í stofunni og tjaldað úti í garði á sumrin, þetta þótti ekkert mál og alltaf nóg pláss. Núna eru allir að afsaka sig ef þeir “neyðast til” að snýkja sér gistingu yfir eina nótt og finnst að þeir séu að troðast inn á heimilið. Mér þykir rosalega gaman að fá gesti og ég tala nú ekki um ef þeir fást til að stoppa í meira en einn dag. Ég viðurkenni samt að ég sjálf er alls ekki nógu dugleg að fara í heimsókn til vina minna, verð að bæta úr því.

Lítil prinsessa fæddist í nótt!

2004-03-01T13:08:00.000Z

Við heimsóttum Jobba og Álfheiði á Akureyri á leiðinni til baka á sunnudeginum. Ég var að vonast til að Álfheiður yrði búin að eiga svo við gætum skoðað lítið kríli í leiðinni, en hún var ennþá með bumbuna, dem.
Í morgun fékk ég svo sms frá þeim um að það væri komin lítil prinsessa, 50 cm og 3130 g.
Jobbi, Álfheiður, Elísabet og Fríða Kristín til hamingju með dúlluna hlakka til að sjá hana.

skemmtileg helgi

2004-03-01T13:04:00.000Z

Langt ferðalag að baki og brjáluð verkefnavinna framundan í skólanum.
Við Helgi fórum til Raufarhafnar um helgina og tókum Jón Inga með okkur, Margrét Birna fór með Evu Rún í sveitina á meðan.
Það var mjög gaman að koma aftur á Raufarhöfn, eiginlega eins og það væri ekki meira en vika síðan við fluttum þaðan. Ég hefði þó verið til í að hitta fleiri í þessari ferð því það er aldrei að vita hvenær við förum þangað næst. Við gátum þó montað okkur smá af Jóni Inga og sýnt hann á nokkrum stöðum.

Aupair

2004-02-24T13:11:00.000Z

Ég var búin að ákveða að hér yrði ekki hugsað um heimilið fyrr en í apríl. Ég sá að ég gat frekar frestað því, heldur en að fresta því að hugsa um barnið eða skólann. En ég held að ég verði að þrífa því hér angar allt í ælulykt. Margrét Birna er með ælupest og er ekki komin með þroksa til að æla á einhvern ákveðinn stað, þetta fer mest á hana sjálfa, hárið á henni var mjög smekklegt, og svo í rúmið. Held að ég sé að vera búin með öll rúmföt á heimilinu. Það er eins gott að ég er að fá Aupair í þrifin í næstu viku, Rósa Íris vinkona mín er að koma í innilotu í skólanum og ætlar að gista hér.

Afmælisbarn dagsins

2004-02-23T11:22:00.000Z

Helga Dögg á afmæli í dag, hún er 31 árs. Til hamingju með afmælið frænka.

Bolludagur í dag

2004-02-23T11:17:00.000Z

Ég á ekki von á að við borðum margar bollur í dag þar sem Margrét Birna var ælandi í nótt. Það kemur þó ekki að sök þar sem við þjófstörtuðum um helgina og borðuðum nokkrar bollur. Ég á nú samt von á að þegar hún leggur sig að við Helgi laumumst í nokkrar (ef ég þekki minn mann rétt). Verst fyrir Margréti Birnu að vera veik á þessum degi, þar sem hún er mikil rjómakona, hún t.d. borðaði bara rjómann og súkkulaðið af sinni bollu um helgina.

Konudagur

2004-02-23T11:04:00.000Z

Frábært að komast út úr bænum í afslöppun. Ég er að vísu ekki viss um að hinum sem fóru með okkur hafi fundist þetta afslöppun þar sem við Helgi vorum með ormana okkar með okkur, en ég naut þess að minsta kosti. Lærði mjög lítið þó að framundan sé brjáluð verkefnavinna næstu tvær vikurnar, en ég þurfti að safna kröftum fyrir það. Er í smá sjokki yfir öllum matnum sem við innbyrgðum þessa helgi, það þarf mikið af soðnum fiski og karftöflum ásamt slatta af grænmeti næstu daga til að ég nái að jafna mig eftir svona sukk, úff.

Þá er Þorrinn búinn og Góa byrjuð, mér finnst það alltaf smá léttir, styttist í vorið. Konudagur var í gær og ég fékk að sofa út, mikill munaður get ég sagt ykkur. Helgi fór svo út í búð um kvöldið þegar við vorum komin heim og keipti handa mér kökur og færði mér, hann var búinn að plana að elda handa mér góða máltíð en ég afþakkaði það því ég var eiginlega búin að fá nóg eftir allt át helgarinnar, hefði frekar viljað fara út í góðan göngutúr.

Fríhelgi

2004-02-19T11:04:00.000Z

Við fjölskyldan erum að fara í sumarbústað um helgina ásamt Garðari og Guðrúnu (bróður hans Helga og kærustu hans). Það er rosalega gott að komast í frí frá bókunum svona eina helgi. Ég er spennt að komast út úr bænum og er nú á fullu að þvo þvott og undirbúa helgina, það er heil ósköp af farangri sem fylgir minni litlu fjögurra manna fjölskyldu. Maður þarf auðvitað að hafa allt til alls, ekki vildi ég lenda í því að vera ekki með viðeignadi kæðnað fyrir allar aðstæður. Það er aldrei að vita hvernig veðrið verður (við búum jú á Íslandi) svo við verðum auðvitað að hafa með bikiníið (aldrei að tapa bjartsýninni), kuldagallann og allt þar á milli. Helgi verður mjög glaður eins og venjulega þegar ég er búin að koma ferðatöskunum fram í andyri og það er komið að því að bera út í bíl.

Jón Ingi bolti

2004-02-18T22:01:00.000Z

Við Helgi fórum með Jón Inga í skoðun og sprautu í morgun, alltaf gaman að fylgjast með hvað hann hefur þyngst og stækkað. Hann er rúm 7 kg og 64,5 cm. Við þurfum ekki að koma með hann fyrr en fimm mánaða næst, en getum komið með hann í vigtun þegar hann er fjögurra mánaða ef við viljum, sennilega verð ég svo forvitin að ég fer með hann þá til að vita hvað hann hefur þyngst og stækkað.

Gott að koma heim

2004-02-18T21:57:00.000Z

Heimsótti gamla vinnustaðinn minn, leikskólann Laugaborg. Það er alltaf svolítið eins og að koma heim þegar ég kem þangað, ennþá mikið til gamla starfsfólkið svo ég þekki flesta sem vinna þar þó að ég hafi verið að vinna þar síðast árið 2000.

Verð að nýta Helga í eitthvað annað!

2004-02-17T11:40:00.000Z

Ekkert frost í dag, þar fór vonin um að Helgi væri berdreyminn. Hann er að vísu dauðhræddur um mannorð sitt með þessum skrifum mínum hér, hann er ekki mikið fyrir spádóma og forlagatrú. Ég var bara að vona að það væri hægt að nýta hann í eitthvað slíkt, stundum getur verið svo ansi gott að vita hvað gerist í nánustu framtíð.

Partý!!!!!!!!

2004-02-17T11:38:00.000Z

Hitti Sollu á spjallinu á MSN í gærkveldi (hún er með mér í skólanum). Við töluðum um að það þyrfti að hrista hópinn saman því við förum ekki í innilotu í skólanum fyrr en næsta haust. Hún ákvað því að bjóða okkur öllum í partý heim til sín. Hún var ekki lengi að því, tveim mínútum seinna var hún búin að senda öllum hópnum bréf um heimboðið. Vonandi mæta sem flestar. Ég verð að finna einhverja leið til að komast þó að ég sé með barnið á brjósti. Ég á t.d. systur sem eiga vinkonu sem býr rétt hjá Sollu, heppilegt. Annað hvort fær vinkonan eða systur mínar þann heiður að passa drenginn þar, tilvalið, þá get ég hlaupið yfir og gefið honum.

Er Helgi berdreyminn?

2004-02-16T12:47:00.000Z

Hann dreymdi eitthvað á þá leið að það var skyndilega komið vor, trén orðin græn og ég man svo sem ekki alveg hvernig draumurinn hans var en þar kom fyrir talan átta. Er þetta ekki fyrir frosti í átta daga? Hvað segið þið? Fyrsti dagurinn er í dag og þá kom frost.

Valentínusardagurinn

2004-02-16T12:40:00.000Z

Á Laugardaginn var hinn rómantíski Valentínusardagur Ameríkana. Við hjónin vorum ekki með neitt sérstakt planað að því tilefni, vissum reyndar ekki af honum fyrr en samdægurs. Mér er svo sem alveg sama hvað aðrir gera á þessum degi en ég hef ekki áhuga á að taka þátt í þessum ameríska sið. Bóndadagur og Konudagur eru gamlir íslenskir siðir og eru alveg nóg fyrir mig.

Dagurinn var nú samt mjög skemmtilegur. Við buðum Garðari í morgunmat og Helgi mallaði í okkur brjálaðan enskan morgunverð (með beikoni, eggi og öllu tilheyrandi). Þetta er allt of þung máltíð til að teljast morgunmatur að mínu mati, enda var ég að jafna mig fram eftir degi.

Fór til Hobbu (Þorbjörgu Ottu) sem er með mér í náminu að vinna verkefni en okkur varð ekki mikið úr verki. Ræddum heilmikið um tónlist og lærðum svo sem nokkuð á því.

Systur mínar hópuðust hingað í heimsókn og gerðum við okkar besta við að pína hver aðra með hárreitingum (vaxmeðferð). Helgi greyið flúði í tölvuna og hélt sig þar á meðan við systur ræddum um fergrunaraðferðir ýmis konar, blæðingar og margt skemmtilegt (sérstaklega fyrir karlmenn).

Við Helgi ætluðum svo um kvöldið að elda okkur ágætis steik og hafa það næs yfir kertaljósi og sjónvarpi. Steikin reyndist vera útrunnin (stórhættulegt fyrir Helga), þannig að við redduðum okkur með einhverjum borgurum úr frystinum. Ég sat svo um kvöldið, með Jón Inga í fanginu og horfði á sjónvarpið á meðan Helgi var í vefsíðusmíðum í tölvunni og við kveiktum ekki einu sinni á eldspítu hvað þá meira.

Halló!!!!

2004-02-13T13:32:00.000Z

Helgi er á FrontPage námskeiði og er því að vinna í síðunni minni. Hann er að laga hana eftir að ég á einhvern dularfullan hátt breytti henni í hestasíðu. Þar er sennilega að koma upp á yfirborðið leyndur áhugi minn á hestum (nú ætti pabbi að vera ánægður). Við ætlum að breyta síðunni minni í fjölskyldusíðu þar sem við munum skrifa fréttir af okkur (sennilega helst af Margréti Birnu og Jóni Inga). Vonandi verðum við líka dugleg við að setja inn myndir.
Ég ætla svo sem oft áður, að reyna að gerast tölvunörd og skrifa hér reglulega (en munið að reglulega getur verið einu sinnni á ári).